Cinzano

Liebe Cinzano, geschter 02.10.2024 hani di müesse la gah, es tuet unheimlich weh und Du hesch wie e Teil vo mir mitgno. Ig wünsche Dir, dass Du guet über d Rägebogebrügg bisch cho und jetzt schmärzfrei chasch bi andere Hundis, Fründe und Familie si, wo scho si gange. Meh als 15 Jahr bisch Du bi üs gsii, Du bisch ganz es wichtigs Familiemitglied für mi gsii, mir hei mängs schöne und ou weniger schöne teilet. Bisch mi chli Fründ gsi, mi chli Hund, aber e grossi Liebi, Dir hani alles chönne verzelle u Du hesch mir immer geduldig zueglost. Du bisch liebenswärt, mängisch übermüetig, neugierig, ungeduldig, immer vorwitzig und verfrässe gsii. Du hesch immer gluegt woni bi, hesch mänge Tag geduldig uf mi gwartet und wenni bi umecho, vor luuter Freud e riese Tanz ufgfüert und mir so Dini ganzi Zueneigung zeigt. Du hesch alles mitgmacht, sogar die Wanderige wo mir zäme unternoh hei, seie sie ou no so läng, stotzig, höch ufe u mängisch ou chli chalt gsii, hesch alles mit Freud mitgmacht und ersch denn, mit Vierzähni bisch langsam ruhiger worde, hesch nümme so möge u hei dini Beschwärde nümme alles zueglah. Trotz diverse Zwüschefäll wie Lähmigs-Erschinige vo Hundebiss im Rügge, Bandschibe-Vorfall und paar andere Gebräche, hesch nie ufgäh und Di immer wieder ids Läbe zrüggkämpft bis zletscht. Ig danke vo Härze für alles was mir hei zäme dörfe erläbe. Du fählsch mir unändlich und ig vermisse Di. Tschüss Cinzu, machs guet - Bis mir üs wider gseh

Heimberg |